Om hierdie merkwaardige man se prestasies tydens sy loopbaan te probeer verwoord is ‘n byna onmoontlike taak.  As akteur, suksesvolle skrywer, televisiepersoonlikheid en dikwels omstrede sosialemedia-kommentator, het hy nog altyd intens daarop gefokus om stories te vertel deur musiek, wat aanklank vind by kultuurbewustes asook by diegene wat bloot die ritme van drie en ’n half minute se pret wil voel. “Ons fragmenteer die oomblik,” sê hy. “My liedjies wys iets van die dinamiek van Afrikaans, en die lekkerste deel van kultuur is dat dit nie gereguleer kan word nie.”  Steve het sedert 1987 al heelwat gereis, opnames in Los Angeles gemaak en vir ’n rukkie in België gewoon om opnames en optredes saam met Dana Winner te doen. So tussen die skryfwerk en opnames (met onder andere Patrizio Buanne), plaaslike en wêreldtoere deur het ek hom gevra hoeveel albums en dinge hy al geproduseer het.  Sy antwoord, “32 albums, 11 boeke, verskeie films en televisiereekse en 6 kinders”.  “Ek het drama studeer en alles wat daaruit gespruit het, het my lewe geword,” vertel hy. “Teater, televisie, skryf, rolprente en musiek – dit is nou alles deel van my. Die boek-ding was waarskynlik onvermydelik. Hoewel dit nie my hooffokus is nie, kon ek dit gelukkig stadig benader. Ek vind ek moet skryf, en soos elke ander aspek van my loopbaan, vind die een baat by die ander.”